ថ្ងៃអាទិត្យ ទី៣ ខែកក្កដា ឆ្នាំ២០១៦ ម៉ោង ១៩:៣៨ (03-07-2016 19:38) រាជធានីភ្នំពេញ ៖ បុរសជាជនសង្ស័យរក្សាទុកសារធាតុញៀនម្នាក់ ត្រូវបានកម្លាំងនគរបាលប៉ុស្តិ៍ទំនប់ទឹកធ្វើការឃាត់ខ្លួន ដោយដកហូតបានថ្នាំញៀនចំនួន ២កញ្ចប់តូច និងដាវសាម៉ូរ៉ៃមួយដើម ខណៈពេលដែលធ្វើការល្បាតពេលយប់នៅក្នុងភូមិសាស្ត្ររបស់ខ្លួននោះ។ ការឃាត់ខ្លួននេះដែរបានធ្វើឡើងកាលពីវេលាម៉ោង០៣និង០០នាទី យប់រំលងអាធ្រាត្រ ថ្ងៃទី០៣ ខែកក្កដា ឆ្នាំ២០១៦ នៅចំណុចមុខផ្ទះគ្មានលេខមួយកន្លែង ស្ថិតនៅលើផ្លូវលេខ៤០២ ក្រុម១៦ ភូមិ០២ សង្កាត់ទំបន់ទឹក ខណ្ឌចំការមន។ តាមប្រភពព័ត៌មានពីមន្ត្រីនគរបាលបានប្រាប់ឱ្យដឹងថា បុរសជនសង្ស័យមានឈ្មោះ អាន អឹត អាយុ៣០ឆ្នាំ មានមុខរបរនិងទីលំនៅមិនពិតប្រាកដ។ មុនពេលកើតហេតុ ខណៈពេលដែលកម្លាំងនគរបាលធ្វើការល្បាតនៅក្នុងភូមិសាស្ត្ររបស់ខ្លួននោះ លុះមកដល់ចំណុចខាងលើក៏បានឃើញបុរសជាជនសង្ស័យខាងលើកំពុងតែដើរនៅតាមដងផ្លូវតែម្នាក់ឯង ដោយមានការសង្ស័យក៏ហៅធ្វើការសាកសួរ។ តាមប្រភពដដែលក៏បានប្រាប់បន្តទៀតថា ពេលនោះកម្លាំងល្បាតក៏បានធ្វើការឆែកឆរក៏បានប្រទះឃើញថ្នាំញៀនប្រភេទម្សៅក្រាមសថ្លាចំនួន២កញ្ចប់តូច និងដាវសាម៉ូរ៉ៃមួយដើមផងដែរ ដែលរូបគេបានលាក់ទុកជាប់ននឹងខ្លួន ក៏ធ្វើការឃាត់ខ្លួនតែម្តង។ ក្រោយពេលឃាត់ខ្លួនបុរសជាជនសង្ស័យរក្សាទុកសារធាតុញៀនខាងលើ រួមទាំងវត្ថុតាងរួចហើយក៏បាននាំខ្លួនមកកាន់ប៉ុស្តិ៍នគរបាលទំនប់ទឹក ដើម្បីធ្វើការសាកសួរ និងកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌចំការមនចាត់ការទៅតាមផ្លូវច្បាប់ជាបន្តទៅទៀត ៕
